((**(( حمــّـالة الأسيــّـة ))**)) ==== بقلم الشاعر ===== محمود جنيدى
- ((**(( حمــّـالة الأسيــّـة ))**))
- ***************************
- كتبها / محمود جنيدى
- ******************
- أنا لما حبيتك يابلد ..
- كنت عارف انك أمى ،
- وانا ابنك الولد ..
- وكنت حاسس ان طريقى صعب ..
- ومش مفروش بورد ..
- مانا اصلى قريت فى كتاب التاريخ ،
- وعرفت اللى حصل زمان ،
- من أيام جد الجد ..
- وحكولى عن بهية ،
- لما شافت اللى قتل ياسين ..
- وعن دنشواى ،
- أما الولاد شافوا المشانق ،
- وأبّهاتم جثث متعلقين ..
- وعن " ديليسيبس " والكنال ..
- وحكولى عن الفالوجا ..
- وعن تمانية واربعين ..
- وعن حريق القاهرة ،
- مفتاح ثورة يولية ..
- وعن شهامة بور سعيد ستة وخمسين ..
- وتيجى ضربة خمسة يونية ..
- ياااااااااه ..
- ياه يا أمى كل ده شفتيه .؟؟.
- كل ده شريط طويييييل قدام عنية ..
- لكن .. الحق ينقال ..
- عمرك ما انحنيتى يوم ..
- بالعكس ..
- واقفة رغم الهموم ..
- واقفة شامخة ورافعة راسك ..
- النزيف فى قلبك ،
- والدموع فى عيون ناسك ..
- وبرضه واقفة زى مانتى ..
- ويطلع من بين ولادك ولد ..
- ماجابتوش ولاّدة ..
- شرب من لبن أمه والنيل سقاه زيادة ..
- وحطّوا الولاد اديهم فى ايده ،
- وقالوا الله أكبر ..
- وعدّوا وعبروا المستحيل ..
- ساعتها سمعت زغروتة بهية ..
- وهى بتنادى : يامة ياسين مماتش ..
- وولاد دنشواى طلعوا جثث ميّتينهم ..
- وطفّوا نار الحمام والقش ..
- وغيرهم وغيرهم وغيرهم ..
- لكن ظهروا اللى استكتروا الفرحة عليكى ..
- اللى يقول إخوان ..
- واللى يقول إرهاب ..
- واللى يقول خراب ..
- ويموتوا تانى ولادك زينة الشباب ..
- كل ذنبهم إنهم واقفين يحموا ناسك ..
- وإنهم حرّاسك ..
- كل ذنبهم إنهم رجال ..
- مايعرفوش الإنكسار ولا المحال ..
- وتطلع طلقاتهم تقتل فيهم الحياة ..
- لكن أبدا مابيقتلوش الرجولة ..
- نسيوا إن الأرض بتطرح تحتهم بطولة ..
- نسيوا إنك حمّالة الأسيّة بجد ..
- لا يكسرك إرهاب ولا تركعى لحد ..
- بس وحياتك يا أمى ..
- أنا باكتب دلوقتى ،
- وعارف انك شايلة همى ..
- إبنى "عبدالرحمن" حيشيل سلاح ..
- واخته "آلاء" مستعدة تشيل سلاح ..
- ماهو لازم تفضلى يامصر براح ..
- ولا حيهزك ألم ولا نزيف الجراح ..
- ولا حتبكى على فراق اللى راح ..
- لكن حتفضلى مصر يامصر ..
- واللى بعدنا برضه حيحكوا زيّنا التاريخ ..
- وحيقولوا لولادهم إنك يامصر :
- أم الدنيا ..
- وإنك أصل التاريخ ..
- ***************
- 2017/10/28
ليست هناك تعليقات:
إرسال تعليق