بحر هواني ==== بقلم الشاعر ===== طارق السيد
- بحر هواني
- كنت زمان بقول ميرسي
- وثانك يو وتريه جانتيه
- وبقول أونكل وبقول طانط
- وبونسوار وبونانويه
- كل الناس كانوا من حواليا
- رهن إشارتي وملك إيديا
- وقبل مااطلب حاجة تجيني
- أعطش 100 إيد تملالي مية
- كنت بوزع مالي عليهم
- وبحقق ليهم أمانيهم
- كنت شايلهم جوة عيوني
- وأقول دول ناسي هيتمر فيهم
- فجأة في لحظة إتغير حالي
- فوقي بقا تحتي يميني جه شمالي
- إتذليت والحوجة ركبتني
- وكل الناس بتقول وأنا مالي
- فين أصحابي وفين أحبابي
- محدش بيخبط على بابي
- كله رماني في بحر هواني
- خلوني شبت في عز شبابي
- طبع الناس بقا ردي كدا ليه
- إللي معاه بيبوسوا إيديه
- واللي معوش مابيلزمهوش
- بالبرطوش بيدوسوا عليه
- كله ماشي يادنيا شمال
- كله مال فيكي لجل المال
- لحد إمتي يادنيا قوليلي
- هنعيش فيكي على دا الحال
- بقلم طارق السيد
ليست هناك تعليقات:
إرسال تعليق