كلها قوانين ==== بقلم الشاعر ===== ابو ندى عبدالجواد
- كلها قوانين
- .
- فى قانون الزمن
- لازم تدفع التمن
- عشان تعدى السنين
- .
- وفى قانون الهوى
- لازم فؤادك يتكوى
- وتصبح من العاشقين
- .
- وفى قانون الشقا
- لاتعرف معنى اللقا
- وتعيش من المساكين
- .
- وفى قانون الأمل
- لازم تبقى جمل
- وتخطى على السكاكين
- .
- وفى قانون الماهية
- تتعشى فول وطعمية
- وتتغطى وتنام حزين
- .
- وتسهر ماتفرحشى
- وتضحك ماتضحكشى
- هى كلها قوانين
- .
- أصلها قوانين ودايرة
- فى البرارى والندايرة
- وعزبة ابو حسين
- .
- حتى بحيرة البجع
- صبحت مليانة وجع
- والنورس ماعدله رنين
- .
- من كتر ماصابه الملل
- عقله جاله خلل
- ولا عنده طحين
- .
- ومدام الفكر جاله
- إزاى هتعيش عياله
- ويبقوا مبسوطين
- .
- مرة سألنى وقال
- ليه بتكتب الموال
- عن الشقا والطين
- .
- رديت عايش فيهم
- وبأصحى من نومى الاقيهم
- ع البيبان واقفين
- .
- ومدام بيصبحوا عليا
- لازم أسيب اللى فى إيديا
- واكتب لهم دواوين
- .
- يعنى يرضيك يانورس
- أعمل بقى حورس
- واسيبهم ع البيبان قاعدين
- .
- وبصيت لقيته ماشى
- وقال دنيا ماتسواشى
- وراح الفل والياسمين
- .
- ولما ناديت عليه
- لقيته مشبك إيديه
- وفاضت روحه لرب العالمين
- .
- ياعينى مات مقهور
- وكان وسط الطيور
- من الشاطرين
- .
- بقلمى ابوندى
ليست هناك تعليقات:
إرسال تعليق