ست_الحسن ==== بقلم الشاعر ===== محمد بكر
- #ست_الحسن
- فرد الشتا سحاب عبايته
- ع القمر
- نزل المطر
- غسل الشوارع والمباني والبيوت
- بس القلوب محتاجه من فيض الشتا
- نقطه مطر
- يمكن يشيل الهم اوننسي اللي فات
- اول شتا يجي ياست الحسن من بعد الفراق
- شايل سيول اليأس وكأنه اتفاق
- انتي تغيبي بالفراق
- والشتا يفرد حنين الاشتياق
- والغربه تحضني في سفر
- نزل المطر
- قلب الطريق لساه بينبض خطوتك
- بيعدها
- يِطّول ساعات لاجل ما تزيدي الخطي
- لكنه بعد الهجر بقي فاضي وحزين
- رافض لغيرك يلمسه
- راجع كما سيرته الاولي صنم
- حبه صخور متجمعين
- اشلاء طريق
- كان اللقا ساعه المغارب من سنه
- والشمس بتلم الخيوط لاجل الغروب
- والطير بيجهز لاجل ما يعود للبيوت
- والسما من فرحة لقانا مزوقه
- بلونها الدهب
- حتي السحاب راسم وشوشنا بتبتسم
- كان كل شئ بالفرحه لينا بيترسم
- حبة ورود .. فرعين شجر
- تامم من الفرحه القمر
- فجاءه ظهر طيفك شبح
- من غير فرح
- من غير ما تجري واحضنك
- كان اللقا زي الجليد
- قلبك حديد
- بصيتي في عنيا اوي
- قلتيلي لازم نفترق
- سيبتيني قلبي بيتحرق
- سيبتيني مش سامع كلام
- والوقت مش راضي يمر
- كل كلمه كات بتطلع كات
- بتاخد مني عمر
- كل تنهيده بتسمع
- صوت صراخي بطعم مر
- ليه ياست الحسن ليه
- بعتي قلبي بكل يسر
- ساعة اللقا
- كانت عيوني م الفراق ينزل مطرها
- انا جوه مني حاجات محتاج اكسرها
- كام ذكري بتضمنا هاكسب لو اخسرها
- حكايتنا لغزغريب قتلتني اسرارها
- مين اللي قال ان الفراق هو فراق جسدين
- مين اللي قال ان البعيد هو بعيد العين
- في ناس بعيده بالفراق
- لكن هنا عايشين
- فيه دم ما بينشفش.. فيه جرح ما يلمش
- فيه دمع ما بيتشافش ..فيه حضن ما يضمش
- قاتل دبح في القلب ..لقتيله ما اهتمش
- عَمدت قلبي نبي من بعد ما مشيتي
- كانت عيونك سما لسمايا خبيتي
- غريب وداير انا ببحث علي داري
- زرعت ارضك غُنا طرحتي ما اديتي
- مابقاش فاضلي م الحكايه غير حبة ساعات
- حبة ورق ينكتبوا بحروف من امل
- حبة صور يتاخدوا في نفس المكان
- مابقاش فاضلي من كل الهنا
- الا انا
- انتي وانا
- حرفين وكانوا في اللغه
- ممنوع الانضمام
- ممنوع يكونوا في كلمه واحده
- قريبين
- لكن قدرنا شدنا خدنا الحنين
- قربت المس جوه منك النقط
- لقتني حرف وكان قريب بالغلط
- فمشيت وانا حالف بإني مش هعود
- مش هانكسر ولا هابقي لحن قديم في عود
- ولا هابقي غنوه حزينه للشاطر حسن
- لكني كلمه حب وخانتها العهود
ليست هناك تعليقات:
إرسال تعليق