هم زين جريت الحبل ==== بقلم الشاعر ===== عبدالامير الركابي
- هم زين جريت الحبل
- هم زين جريت الحبل
- لو مااجره جان شفت الحيه
- جنت اخاف وجنت ماجره كبل
- اللي يجر الحبل ماله ديّه
- هم زين جريت الحبل وي الخيط
- جريته ولنه يتراولي شعيط
- مجبور اكطعه والعن اللي جابه
- وشرد كبل مايجي فوكاهه بعيط
- هم زين جريت الحبل والستلي
- خيط وتشربك ويه راده ومريود
- فورت ماي وغسلت بالكتلي
- وحطيت حبلي فوك راس ام محمود
- هم زين جريت الحبل ويه الليف
- كلشي اجره يطلع بلايه راس
- والحيه تطلع بالشتا مو بالصيف
- بالصيف راس الحية ماظن ينداس
- هم زين جريت الحبل وي الحظ
- حتى يتفتفت بيدي ويصير علوك
- ظليت فحطان واهومش واركض
- والحبل لاينزل ولا يصعد فوك
- هم زين جريت الحبل بالصدفه
- لو مااجره جان ضيعت سنين
- ساعه انتبه ساعة انام واغفه
- وساعه انا وربعي نظل متانين
- هم زين اكو حبل ونظل انجره
- لو ما حَبلنه جان صارت صعبه
- العمر من دون الحبل شيدبره
- جبحات كلهه والنلزمه نذبه
- هم زين حطيت الحبل بالجوله
- لو مااحطه جان صارت هوسه
- كلمن يشد بيه ويثبت حموله
- الحبل قانون واله ناموسه
- هم زين جريت الحبل ويه الراح
- جبته وتحاسبنه وطلعلي زايد
- طلعتلي جوريه وفراشه وقداح
- والعيد وياهه وضحك ومعايد
- هم زين اجرن بالحبل كل عمري
- الحبل احسن من عمر ماينجر
- خلصت عنباتي وخوخي وتمري
- وصريت صرتي والحبل ماينصر
- هم زين اجرن بالحبل مااتعب
- اليتعبه جر الحبل ماينلام
- حتى ولوكضاهه بس يتعذب
- الحبل ياذي صاحبه بالاحلام
- ياحيف جريت الحبل واني جبير
- لو بالزغر جريته احسن بهواي
- اللي يجر الحبل يكدر يطير
- ولمن اطيرتطيرفوكي بلواي
- هم زين جريت الحبل
- هم زين
- هم زين
- واضبط من كبل
ليست هناك تعليقات:
إرسال تعليق