صاحبى جالي يقولى مالك ==== بقلم الشاعر ===== مدحت يوسف
- صاحبى جالي يقولى مالك
- مش طالع لك أى صوت
- قولى إيه اللي جرالك
- وليه مطول ف السكوت
- قولت له يا صاحبى عال
- ألف شكر على السؤال
- اللي خلىٰ حالي مال
- خلق بتقطع ف الخيوط
- خلق فيها كتير عيوب
- شيطانها مش عايز يتوب
- دايماً تْكسرّ ف القلوب
- وممكن تْخرّب ف البيوت
- إللي ناسى واللي قاسي
- واللي كرّه فيَّ ناسي
- اللي صورته جوة راسي
- إنه غول عامل كيوت
- إللي عمره ما قالى مالي
- اللي بيضَّيع أمالى
- واللي واخد منى مالي
- فاكره صاحبى وهو حوت
- إللي سابني وحيد ف همي
- اللي نفسه يسيل لى دمي
- اللي زود فيَّ همي
- واللي كان على ضهري سوط
- بس اقولك ع العموم
- عُمر ما فيها حال يدوم
- بكرة تروح كل الهموم
- وحبقى حلو.... لما #اموت
- .
- .
- مدحت يوسف
ليست هناك تعليقات:
إرسال تعليق