**{ يلا_يا_نفس_بينا_نتوب }****==== بقلم الشاعر ===== مدحت يوسف
- *****{ #يلا_يا_نفس_بينا_نتوب }*****
- .
- .
- في شَّعر الشيب وحَنّي الضّهر
- وقُصر الشّوف على الخطوة
- تبان في الوش تجعيدة
- وجوة القلب تنهيدة
- بتنهج من خطاوى الدّهر
- تجُرّ الخطوة عُكازها
- تْهزّ الذكرىَ بروازها
- تدوب الفتلة ع الحيطة
- وتسقط كاسرة بروازها
- ده عجز ولّا كان إعجاز
- مفيش خطوة بدون إنجاز
- ليه لما تحس بنهايتك
- بتنادي الذكرىَ ف البرواز
- بقيت أعمىَ بقلب بصير
- بتحس بلمسة إيه حيصير
- وبين الضحكة والدمعة
- قاسيت ياما وشوفت كتير
- وبرضه لسة بتعافر
- نبشت الأرض بالحافر
- ماتعمل لأخرتك يمكن
- فاضلك لحظة وتسافر
- ولو يوم تاخدك الدُنيا
- إهرب مْنّها ف ثانية
- وانّدم ع اللي راح منك
- ف دُنيا أصلها فانية
- لو كان فيها دام حالك
- ماكنش حيبقي ده حالك
- ف زود منها ترحالك
- بكل التقوىَ للأخرة
- دي دُنيا مننا ساخرة
- دي سوسة ف العظام ناخرة
- ف ليه يا نفس مفتخرة
- وجْسّمِك ف التُراب نازل
- مفيش ف النار جدار عازل
- ولا ف الجنة متنازل
- يْحِنّ لجسمنا الهازل
- ف يدينا ولو حسنة
- ولا صحابنا ولا ناسنا
- ولا اللي جُم بأنفاسنا
- ولا اللي كْلّ حَصاد فَاسنا
- ولا اللي ف إسمنا مكتوب
- ف يلا يا نفس بينا نتوب
- ونعمل حسنة تمحي ذنوب
- عشان نقابل المحبوب
- يسقينا بإيده م الكوثر
- يبل الريق اللي متكسّر
- وبنوره القلب يتأثر
- ويْخلّي الحِلّم يتفسّر
- يشيل م القلب تنهيدة
- بتنهج من خطاوي الدهر
- يروح الشيب وحني الضهر
- .
- .
- مدحت يوسف
ليست هناك تعليقات:
إرسال تعليق