أمي .. ووجع الطنين ******** بقلم (للشاعر يوسف الحمله)
- أمي .. ووجع الطنين (للشاعر يوسف الحمله)
- أنا والله
- كتبت عن حالات كتير يا أمه
- لكن عمري ما كتبت عنك
- ولأنك أكبر من أي وصف
- ولأنك دايماً في أول صف
- يبقى هقول فيكي ايه
- ده قلمي لو يحسن التعبير
- في وصفك يا أمه يحتار كتير
- بس لما جيت أكتب عنك
- قالولي ودن أمك اليمين
- فيها طنين
- وودنها الشمال
- عضلة السمع
- ضعيفة حبتين
- قلت لهم
- أمي مبتسمعنيش بودنها
- أمي بتسمعني من قلبها
- لأني يا أمه أنا خابر قلبك
- وعارف اد ايه حنين
- ولا عمره بين غير الحنين
- صحيح أنا زعلان علي سمعك
- لكن مش هيحجبني عنك الطنين
- عارفك يا أمه
- ياما سمعتي في زمنا
- وعود كتيييير كدابه
- وشوفتي كدابين الزفه
- للي مالك الدفه
- وشوفتي المطبلتيه
- وشوفتي المنافقين
- يبقي هيفرق ايه معاكي الطنين
- مش أحسن يا أمه ما تسمعي
- عن بيع الطين
- عن مص دم الغلابة الشقينين
- والله يا أمه ربك رحيم
- رحمك من سمع الزيف
- ومن عليكي بالطنين
- إرتاحي يا أمه
- من سمع الأخبار وجشع التجار
- من سمع النفاق والخناق
- في الشوارع والميادين
- الكل عامل فيها يا أمه أبو الفوارس
- وأما كرشه يصرخ في وشه
- يخطف له طفل من قدام المدارس
- يتاجر في الحرام يبيع في برشام
- يحرق في مساجد ويحرق في كنايس
- علشان الفلوس يا أمه
- يتفق مع الشياطين
- يبقي ربك رحيم
- ومن عليكي بالطنين
- وقادر يعنيك ع اللي إنتي فيه
- وترتاحي يا أمه ليوم الدين
- وترتاحي يا أمه ليوم الدين
- دول شوية كلام يا أمه
- وطلعو من قلبي
- وحياتي عندك سامحيني
- هو أنتي ناقصه هم
- كفاية عليكي هم سنين
- إرتاحي يا أمه
- وربنا يقويكي على الطنين
- ولا تسمعي تاني لوعود الكدابين
- ومتزعليش يا أمه
- عِلمنا كتييير وجهلنا أكترررر
- والدوا في الصيدليه
- وانتي واقعة من التأمين
- زي كل الفلاحين
- زي كل الغلبانين
- إرتاحي يا أمه
- وربنا يقويكي على الطنين
- وأنا هصلي يا أمه
- وهدعيلك في سجودي
- ماهو مفيش في الدنيا أحسن
- من بر الوالدين
- مفيش في الدنيا أحسن
- من بر الوالدين
- أمي ووجع الطنين
- بقلم الشاعر يوسف الحمله
- 20/3/2018
ليست هناك تعليقات:
إرسال تعليق