حوار الغرام ==== بقلم الشاعر ===== عصام الباز
- حوار الغرام
- من إمتى يا واد حبيتني
- من قبل ما أشوفك يختي
- بصراحة يا واد جنيتني
- ماهو إنت طلعتي في بختي
- عاوزاك بصراحة تجاوبني
- قولي ولا يمكن أخبي
- لو أحكيلك هتكذبني
- طاب إزاي أنا أكذب قلبي
- ليه اخترتني بالذات
- فضلتني عن أي بنات
- علشان إنسانة بسيطة
- ولا عمرك كنتي حويطة
- طاب أصارحك ولا تزعلش
- خطبني واحد قبلك
- خطبني قبل ما أقابلك
- في الماضي أنا ما أسألش
- لو نجم م السما جابلك
- راح تنسى يا روحي الماضي
- هأنساه وأنا فعلا راضي
- طاب عارف هنعيش فين
- في شقة يا دوب مترين
- دا بخل وللا دا إيه
- مترين راح يعملوا إيه
- ما إحنا واحد مش اتنين
- طاب أوسع من كدة ليه
- خلاص يا حبيبي موافقة
- ولا حتى هأبص لنفقة
- والله يا بت أصيلة
- المهم يا ناس ع العيلة
- أقول لك سر كمان
- مش عاوزة أنا فستان
- راح أجيبلك طقم كوليه
- والفرش أغلى ستان
- تسلملي يا نور العين
- والشهر نقضيه فين
- أنا وإنت على مجاويش
- إن شالله في عشة نعيش
- يا حبيبي خلاص حبيتك
- عمري وعيوني هديتك
- من بكرة هأروح لأبوكي
- هتعيشي عيشة ملوكي
- إوعى يا حبيبي تتأخر
- متكتبش ليا مؤخر
- طيب يا حبيبتي سلام
- دلوقتي هأروح أنام
- طيب يا عمري سلام
- سلام
- عصام الباز
ليست هناك تعليقات:
إرسال تعليق