حرف ورد ==== بين الشاعر ===== مصطفى تيسير ===== والشاعر ==== عونى هشام

• مصطفى تيسير وعونى هشام 
• ٠٠٠٠٠٠٠٠٠حرف ورد٠٠٠٠٠٠٠٠
• ==========
• ٠٠٠٠٠٠٠٠٠٠٠٠ مصطفى
• و أما بعد ..
• أنا مش جايلك أترجا
• و لا بإيدي أحل الوعد
• و لا ببكي علي الذكرى 
• و لا طالب نكون مع بعض
• و مش هستني منك رد
• لأخر مرة هكتبلك 
• و هرجع بيكي للماضي 
• جوابي مش جواب عادي 
• عشان أخر جواب مكتوب 
• لأخر نبض في فؤادي 
• جواب الصبر من أيوب 
• قولي إزاي في حبك أتوب ؟
• مانش طمعان 
• في جنه حضنك المرمر 
• و لا جايلك و بملى شروط 
• و لا كان قصدي أتأمر
• و لا كان الهوي مشروط
• قُصادك قلب عاش ميت و متدمر 
• فـ مين راح يبني و يعَمر ؟
• في قلب الكل فيه بيشوط
• و بكتبلك ....
• فـ سيبي الحرف ينزف دم
• بقالي سنين قاتلني الهم
• لا كنت في عشقي بتربع 
• و لا قلبك في يوم إهتم 
• و لا كنتي الغطا و التوب 
• و لا خوضتي في هوايا حروب 
• فـ سيبي الحرف ينزف فوق ورق قلبي 
• معاكى بيعلى ليه المنسوب ؟
• دا حتي العمر مش محسوب 
• و لو كان الكلام معيوب 
• أنا أسف 
• فـ هقرا كلامي بالمقلوب 
• و هكتبلك ....
• لساني لسه علي قده 
• يتهته لو نطق إسمك 
• صحيح إن الزمن هده 
• و تاه المعنى بين جسمك 
• سنين بكتبلك الأشعار
• و رامي قلبي جوا البار
• و بسكر لأجل أنساكي
• و سايب نفسي للتيار
• بكتب ليكي و بسلم 
• قصايد من ورا الشبابيك 
• و خايف يوم لو أتكلم 
• ليخطف قلبك المماليك 
• و يبقي ليا فيكي شريك
• و بكتبلك ....
• ما بين الشعر و القافية 
• حروف مكتوبه بالعافية
• قصايد عشقك السكران
• مع المَزة و كاس طافية
• مساحة كبيرة مـ الأشواق
• و ليل سهران مع العشاق 
• كلام ما يكتبوش شاعر 
• كلام ما إتقالش في الأوراق
• كلام ما إتقالش من قوال 
• يا أول حرف في الموال 
• غيابك طال 
• و بكتبلك ....
• من القلب إللي عاش محروم 
• ببعتلك سلام دافي 
• سلام من قلب عاش مظلوم 
• فـ ليه تخافي ؟
• دا أنا قلبي دهب صافي
• و بكتبلك ....
• علي الأوراق و بتوضى
• و أسف إني ما أملكشي
• قصايد ليكي من فضه
• إيدي قصيرة جايز 
• و تاه القلب ف الخضه 
• أنا أسف
• قوليلي إزاي
• أجيبلك من خيوط الشمس 
• توب مغزول
• و أمشيلك سنين و أيام 
• علي الكشكول
• عيون الناس بتحسدني
• و أنا المقتول
• قوليلي إزاي
• أشيلك فوق علي كتافي 
• و ضهري من الألم محني 
• دا أنا كسرت مجدافي
• قوليلي كلام يريحني 
• دا لو في الكلمة إسعافي 
• صحيح أنا قلبي كان شاعر 
• و طاير في الفضا بيحوم
• و يوم ما نزلت أنا بحرك نسيت العوم 
• أنا ما أملكش غير حرفي 
• قصايد حب مكتوبة هناك بالكوم 
• دا أنا لا كنت يوم كسرى
• و لا قيصر بلاد الروم 
• بحبك قصة مجهولة 
• و لو فيكي الأجل محتوم 
• هكون زاهد بلاد قلبك 
• مادام فيكي عرفت الصوم
• بقلم .. مصطفي تيسير
• 0000000000000000
• —————————//
• ٠٠٠٠٠٠٠٠٠٠٠٠٠٠٠٠٠٠٠٠ عونى هشام
• واما بعد
• جوابك عندى ليكى الرد
• لا انا ...جى اتوضى
• ولا ..نصلى سنه وفرض
• روحى واعرفى حالك
• خلفتى كتير ف مواعيدك
• ومطلوب منى اكون ع الوعد؟
• فى شرع مين طلباتك
• وليه غيرتى رغباتك
• انا يا حبيتى وحياتك
• هاسيبك تمشى
• طول او عرض
• لاعمرى طلبت احسانك
• ولا قلبى ف يوم خانك
• ولا غنيت بالحانك
• ولا طلبت نبقى لبعض
• جوابى بعته باحساسى
• بلاش تبعتيلى الرد
• روحى وذاكرى فى الماضى
• بلاش نفتى فى الفاضى
• ياريت تظبطى كلامك
• وشوفى مين فينا كان اَّضى
• ولو رديتى لى مكتوب
• بلاش يبقى الكلام معيوب
• عشان هاقراه بالمقلوب
• يرد عليكى حدف الطوب
• بلاش تتغرى بجمالك
• دا انا خيال
• اروض م الخيول ١٠٠
• واهد جبال
• لكم بالعقل والحكمه
• وكله يعود للقسمه
• وعندى بصيره مع فطنه
• وطولة بال
• انا مشاعرى فى ضلوعى
• وقلبى لو خلف طوعى
• هاخاصمه وابعده عنى
• لو كان بعده بالاميال
• انا بكتب ما عندى شروط
• ويوم اغضب اكيد رح اشوط
• اجيب العرض جنب الطول
• واقطع فى اللى كان مشروط
• تعالى نداوى جرح قديم
• بلاش تفكيرنا يبقى عقيم
• نكون اصحاب بلا ها الحب
• وليه الجرح يبقى اليم
• برغم ما بينا عندى سلام
• وهاقبل منكى اى كلام
• كفايه نعيش مع الاوهام
• كفايه سنين ضاعت وايام
• انا اسف انا اسف
• لان كلامى كان كاشف
• لا قلت كلام ماهوش حاصل
• ولا حتى الشريط سافف
• سنين كنت بكتب لك 
• كتير اشعار
• لا عمرى قلت احسب لك
• لكن العقل منى احتار
• اكون فاضى
• الاقى ف فكرى كام مشوار
• احط الميه اعمل شاى
• وانسى انى اشغل نار
• وبالتكرار نسبت نفسى
• وزاد الهم من يأسى
• وقبضت روحى على نفسى
• كأنى سجين ونفسى فرار
• فكان لازم اكون صادق
• فى مكتوبى
• وكان لازم هايجى اليوم
• واعدل تانى من توبى
• واعيد مركبى لشطى
• وقلمى اعيد معاه خطى
• واكتب كل ما بخاطرى
• وامشى بخطوتى واخطى
• صعاب فى حياتى ياما كتير
• فكان لازم من التغيير
• واكون واضح مع نفسى
• ومع غيرى
• واريح راسى م التفكير
• انا خلصت ما عندى
• وقولى كل ما عندك
• ايام العمر بتعدى
• كفايه شبعت من عِندك
• كفايه كدب على روحنا
• نزيد الهم فى جروحنا
• نسيب الماضى بقى ماضى
• ويبقى ذكرى لو رحنا
• ذهقت من سكن البار
• وريحه السُكر والخمار
• نفسى ارجع اكون انسان
• اعيش .......ليه اعيش ف النار
• عشان انسى جنان قلبى
• اللى زاد حيره وزاد غلبى
• ياما كنت اعاند فيه
• وياما مشيت مع التيار
• بعد اليوم ما هاتغزل
• ولا اغزل قصايد حب
• رح ابعد فترة مع قلبى
• واما بعد
• دى كانت قصه وقريتها
• وكان لازم اقوم بالرد
• ——-
• #عونى_هشام