صبح بكره الجاى ... حبيبى ==== بقلم الشاعر ===== فهمى_على

• صبح بكره الجاى ... حبيبى 
• جاى و جايب احلا فرحة 
• ابتسامة لشيخ بلدنا 
• اللى نام و عمايله سارحة 
• اللى كل لقمة جارتنا 
• و اللى داس على ناس غلابة 
• و اللى ساحب كلب شارد 
• و اللى خلا الدنيا غابة 
• ايده طايلة عشان صحابه 
• فوق وشوشهم مافى شئ 
• شمامين و الليل ساكنهم 
• مجرمين ... ساجنين برئ
• صبح بكره الجاى يا طيب 
• امتى هتجيب وش تانى 
• امتى جد هتبقى فرحة 
• امتى هنشوفك امانى 
• افتكرنا ان كنت ناسى 
• مد ايدك خد بايدنا 
• ليه بتيجى تملى قاسى 
• ليه بقيت افة ف وريدنا 
• مش زمان جيت بابتسامة 
• و كان يناير احلا عيد 
• اي اللى خلاك فجأة تنسى 
• و تختفى و تروح بعيد 
• لسه نص الحلم غايب 
• و السما طفيت نجومها
• لسه صاحبى و الحبايب 
• مصر سقياهم همومها
• العيال مش لاقية تاكل 
• و اما تاكل ... اكل موت 
• مكبوتين .. و دا مش تواكل 
• غرقو فى بحور السكوت 
• نفسى مرة تقول لى هاجى 
• و التقيلك فجأة نور 
• او اشوف الباب يخبط 
• ما التقيش من برا سور 
• بكره .... نفسى بجد تيجى 
• و احضنك و امسك ايديك 
• و الجمال ف الكون دا يبقى 
• م الفرح مشدود اليك 
• نزرع الصحرا بغناوى 
• نجنى منها خير كتير 
• و الفقير يلاقيله لقمة 
• و كل شوك يصبح حرير 
• اوعى تنسى معادنا تانى 
• و الوجع يفضل يزيد 
• قول لى حاضر و افتكرنا 
• و ابقى تانى يا بكره عيد 
• #فهمى_على
•