(( افتح لي يا سجان )) ==== بقلم الشاعر ===== أ / عبد الرحمن الحناوي
- همسة من سجين بالخطأ في أذن سجان بعنوان : (( افتح لي يا سجان ))
- تأليف أ / عبد الرحمن الحناوي .
- الثلاثاء 24 من أكتوبر سنة 2017 .
- *************************************
- تعبت وتعبت أعصابي وشفت العذاب ألوان *
- وكل يوم بنادي وأنا مرهق علي السجان *
- تهمتي إيه لو ناسي ما تقوللي يا سجان *
- السجن دوخ راسي وجاب لي عمي ألوان *
- وخنقني في أنفاسي من ريحة المكان *
- لسه المشوار طويل هو انا ليه مدان ؟ *
- قبضوا عليا غلط وانا واقف في الميدان *
- وقالوا لي انتا ( زلط ) صورتك في كل مكان *
- قلت لهم دا كله غلط اسمي أنا ( عدنان ) *
- لا عمري كنت ( زلط ) ولا ثورت في الميدان *
- ولا شيلت مرة يافطة وكتبت عا الجدران *
- ولا روحت مرة محطة كسرت في القضبان *
- لكن جريت بالقوي لما لقيت دخان *
- أنا وقعت ف ورطة ودا حالي يا سجان*
- أنا برئ والله وضحك عليه شيطان *
- أنا برئ من فضلك افتح لي يا سجان *
- المرض ساكن صدري يا ويلي م الغثيان *
- والحشرة مالية شعري والسجن فيه أكلان *
- يوم واحد فيه خلي العقل جاله جنان *
- ياريتني ما كنت أبدا عديت من الميدان *
- دا صاحبي عطوة روح من بدري عا الدكان *
- وأنا اللي قلت اتفرج دلوقت انا ندمان *
- صاحبي فايق مصحصح عايش كدا هيمان
- وانا أيامي اسودت وعايش مع الغربان *
- بكلم روحي واشتت أفكاري أنا الغلطان *
- كان مالي ما كنت مروح حبسوني ليه اتهان *
- أنا اللي جبته لنفسي بمروري في الميدان *
- الثورة ضلت طريقها وانا رحت ف خبر كان *
- *************************************
ليست هناك تعليقات:
إرسال تعليق