ولادنا الشهدا ==== بقلم الشاعر ===== محمد عبد الحافظ
- ولادنا الشهدا
- تقولو غدر تقولوخيانة
- ولادنا ماتو بإيد جبانة
- ماتو فدا الواجب والأمانة
- الضربة كانت مترتبة
- موش محتاجة قوالة
- فى الضهر وضلمة
- وولادنا موش واخدين خوانة
- عملو عملتهم السفالة
- الدم بحر والندا تايه
- الصوت مافيش
- والإشارة صوتها جهارة
- رد يابنى عالقيادة
- رد يابنى ماتوجعش قلبى
- الحقو اخواتكم عالطريق
- القشه بيتعلق بيها الغريق
- لكن كان القدر هناك
- بيوزع لقب شهيد
- والكل عامل حدادة
- يا ولد ماجابتوش ولادة
- يازينه الشباب وجيلك
- اعزم الحبايب يا بويا
- متخافش عملت الأجازة
- اعزم بقلب جامد
- انا راجع
- ماعادتش للتاخير عازة
- وجهز الفرح والكوشة
- وعايز الحنة منقوشة
- يا كل دفعتى
- انتم بكرة معزومين
- بكرة ليلة دخلتى
- عايزكم تبقو فرحانين
- الفرحة موش انا لوحدى
- عايزها ظباط ومجندين
- فى كل مرة نتوجع
- نغرق فى حزننا
- وننسى انا بننخدع
- من اقرب الناس مننا
- كفايانا وجع
- كفايانا بكى
- موش هنخسر تانى جدع
- حق الشهيد
- هنولعها نار من جديد
- احنا اللى فوتنا فالحديد
- وحياة اليتامى والارامل
- والامهات والعوايل
- لدوقو مر السنين
- احنا اللى انتصرنا ف73
- واحنا اللى حطمنا الحصن الحصين
- واللى علمنا الدنيا كلها
- معنى الحب والحرب
- معنى الاسود والكلب
- يعنى ايه مصريين
- وارضهم لها سيادة
- وان اللى انتصر
- كان غصب عنهم عسكرى ببيادة
- بعد دا كله يجو شويه مطاريد
- يرشو شرهم على ولادنا
- وهما فاكرينها صلاة وعبادة
- ايوة بنحارب فى كل اتجاه
- وتعبانين
- وشايلين وجع السنين
- بس واحنا بنحارب بنبنى
- وشد حيلك يابنى
- ولما البنى يعلى
- بنحس بفرح وسعادة
- ياللى موش عايزين تقوم لنا قومة
- ورابطين ايدينا ورجولنا
- ومنيمينا دى النومة
- مصر نزفت كتير ولسه بتنزف
- لكن نزيفها عبيرويشرف
- ولادك يابلدى رجالة كالعادة
- كل ماكتب فى الشهيد
- ييجى شهدا من جديد
- وتكتر االقصايد والقصص
- وتكتر المعازى
- البقية ف حياتك يا مصر
- احنا خانوننا
- وكان نفسنا فى النصر
- بس الخيانة وضع تانى
- مالوش غير حل واحد
- النصر او الشهادة
- الشاعر/محمد عبد الحافظ
ليست هناك تعليقات:
إرسال تعليق